Родри ПСЖ таклифини рад этди
"Манчестер Сити" яримҳимоячиси Родри Франциянинг "Пари Сен-Жермен" клубидан тушган таклифни рад этди. Хабарларга кўра, парижликлар 30 ёшли испаниялик футболчи билан бевосита боғланиб, эҳтимолий трансфер шартларини муҳокама қилишга уринган.
Бироқ Родри ПСЖ вакилларига бу вариантга қизиқмаслигини дарҳол билдирган. Манба таъкидлашича, футболчи ҳатто Париж клуби таклиф қилмоқчи бўлган шартларни ҳам тингламаган ва қисқа қилиб: “Йўқ, раҳмат”, дея жавоб қайтарган.
Ҳозирда Родрининг асосий мақсади фаолиятини “Реал Мадрид”да давом эттириш экани айтилмоқда. Испаниялик яримҳимоячи аввал ҳам Мадрид клубига ўтиш истагини яширмаган. Яқин вақт ичида “Реал” футболчи бўйича “Манчестер Сити”га расмий таклиф юбориши мумкин.
ПСЖнинг Родрига қизиқиши эса клуб раҳбариятининг “Реал Мадрид”га жавоб қайтариш истаги билан ҳам боғланмоқда. Хабарларга кўра, Париж клуби “Лейпциг” ҳужумчиси Ян Диомандани сотиб олиш пойгасида фаворит бўлган, бироқ кейинчалик мадридликлар ушбу трансферга аралашган. Шунингдaн сўнг ПСЖ президенти Носир Ал-Хелайфий Родрининг агенти билан боғланишни шахсан топширган.
Маълумот учун, Родрининг “Манчестер Сити” билан амалдаги шартномаси 2027 йилнинг ёзига қадар мўлжалланган. Ҳозирча футболчи инглиз клуби билан келишувни узайтириш бўйича музокара олиб боришни режалаштирмаяпти.
