Роберто Мартинес: «Ўсиш учун биринчи ўйиндагидек баҳслар керак бўлади»
ЖЧ-2026 гуруҳ босқичи 2-тури доирасида Португалия миллий жамоаси Ўзбекистон терма жамоасини 5:0 ҳисобида мағлуб этди. Учрашув АҚШнинг Ҳюстон шаҳридаги NRG Stadium аренасида бўлиб ўтди.
Ўйиндан кейин Португалия бош мураббийи Роберто Мартинес жамоасининг ҳаракатларидан мамнун эканини таъкидлади. Унинг сўзларига кўра, футболчилар майдонда биринчи учрашувдагидек иштиёқ ва фидойилик кўрсатишган, бироқ бу сафар жамоанинг ўйинида кўпроқ тажриба ва етуклик сезилган.
“Бугун биз кийиниш хонасида айнан шундай реакцияни кўрдик. Турнир давомида ўсиш учун баъзан биринчи ўйиндагидек баҳслар ҳам керак бўлади. Бугун эса биз худди ўша кайфият ва фидойиликка эга, аммо анча етукроқ жамоани кўрдик. Чунки бу энди биринчи ўйин эмас эди. Натижадан жуда мамнунман”, — деди Мартинес.
Эслатиб ўтамиз, Португалия терма жамоаси ЖЧ-2026даги илк учрашувида ДР Конго билан 1:1 ҳисобида дуранг ўйнаган эди. Ўзбекистон устидан қозонилган йирик ғалаба эса португалияликларнинг гуруҳдаги ҳолатини анча яхшилади.
Мазкур баҳсда Криштиану Роналду дубль қайд этди. Шунингдек, Нуну Мендеш ва Рафаэл Леау ҳам рақиб дарвозасини ишғол қилди. Яна бир гол эса Ўзбекистон футболчиси Ўткир Юсуповнинг автоголи сифатида қайд этилди.
Маълумот учун, Португалия навбатдаги турда Колумбияга қарши майдонга тушади. Ўзбекистон эса гуруҳдаги сўнгги учрашувини ДР Конгога қарши ўтказади.