Роберт Левандовски «Ювентус»га ўтишга яқин турибди — манба
«Барселона» ҳужумчиси Роберт Левандовски фаолиятини Италия А Сериясида давом эттириши мумкин. Tuttosport нашрининг хабар беришича, Туриннинг «Ювентус» клуби поляк ҳужумчисининг яқинлари билан алоқага чиқиб, трансфер борасида дастлабки музокараларни якунлаган.
37 ёшли тажрибали форварднинг «Барселона» билан амалдаги шартномаси 2026 йилнинг ёзига қадар мўлжалланган. Бироқ клуб раҳбарияти томонидан таклиф этилган янги битимда маошнинг сезиларли даражада камайтирилиши футболчининг режаларига тўғри келмади. Шу сабабли, Левандовски каталонияликлар сафини тарк этиш вариантини кўриб чиқмоқда ва бунда «Ювентус» унинг учун асосий танлов бўлиб турибди.
Музокаралар жараёнида ўтишнинг муҳим тафсилотлари очиқланди. Хусусан, ҳужумчининг агенти Пини Захави туринликлар билан бир йиллик шартнома бўйича келишувга эришган. Унга кўра, футболчининг йиллик маоши тахминан 6 миллион еврони ташкил этиши ва бунга натижаларга қараб қўшимча бонуслар қўшилиши кўзда тутилган.
Бироқ ушбу трансфернинг амалга ошиши битта муҳим шартга боғлиқ: Роберт Левандовски фақатгина «Ювентус» келаси мавсум учун Европа Чемпионлар Лигаси йўлланмасини нақд қилган тақдирдагина Туринга кўчиб ўтишга розилик беради. Ҳозирда томонлар мавсум якунини ва клубнинг турнир жадвалидаги ўрнини кутмоқда. Агар «Ювентус» ўз олдига қўйилган вазифани бажара олса, поляк юлдуз фаолиятини Италия чемпионатида давом эттириши кутилмоқда.
