Роберт Левандовски Чемпионлар Лигасида Индзагининг рекордини янгилади
«Барселона» ҳужумчиси Роберт Левандовски (37 ёшу 209 кунлик) УЕФА Чемпионлар Лигаси тарихида дубль қайд этган энг ёши катта футболчи сифатида янги рекорд ўрнатди.
OptaJose маълумотларига кўра, польшалик форвард 2010 йилнинг ноябрь ойида «Милан» сафида «Реал» дарвозасига икки бор йўл топган Филиппо Индзагининг (37 ёшу 86 кунлик) натижасини янгилади.
Эслатиб ўтамиз, Чемпионлар Лигасининг 2025/2026 йилги мавсуми 1/8 финал босқичида «Барселона» Англиянинг «Ньюкасл» жамоасини 7:2 ҳисобида мағлубиятга учратди. Икки ўйин натижасига кўра каталонияликлар чорак финалга йўлланма олдилар ва ушбу босқичда Мадриднинг «Атлетико» жамоаси билан куч синашадилар.
Жорий мавсумда Левандовски барча мусобақаларда 36 та учрашувда майдонга тушиб, ўз ҳисобига 16 та гол ва 3 та самарали узатмани ёздириб қўйди.
