«Реал» ёзда Мастантуонони ижарага беришни режалаштирмоқда
Мадриднинг «Реал» клуби ўзининг аргентиналик иқтидорли вингери Франко Мастантуононинг келажаги борасида аниқ тўхтамга келди. The Touchline нашрининг хабар беришича, «қироллик клуби» 18 ёшли футболчига мунтазам ўйин амалиётини кафолатлаш мақсадида уни ёзги трансфер ойнасида бошқа жамоага ижарага беришни режалаштирмоқда.
Клуб мутасаддилари Мастантуононинг ўсиш суръатини Эндрик учун ишлаб чиқилган махсус дастурга қиёслашмоқда. Эътиборли жиҳати шундаки, футболчининг ўзи ҳам, «қаймоқранглилар» ҳам ижарага бериш шартномасига «сотиб олиш ҳуқуқи» бандини киритишни исташмаяпти. Мастантуоно фақатгина Мадридда зафар қучишни кўзлаётган бўлса, «Реал» раҳбарияти унга клубнинг узоқ муддатли стратегик лойиҳаси сифатида қарамоқда.
Ҳозирда клуб ичида ижарага бериладиган энг маъқул жамоа борасида музокаралар кетаяпти, бироқ вазият ёзги ўқув-машғулот йиғинлари ва жамоага келиши кутилмоқдаган янги бош мураббийнинг қарорига қараб ўзгариши мумкин.
Франко Мастантуоно жорий мавсумда барча турнирларда жами 24 та учрашувда майдонга тушиб, 3 та гол ва 1 та голли узатмани ўз ҳисобига ёздириб қўйди. Унинг Мадрид клуби билан шартномаси 2031 йилнинг июнига қадар имзоланган. Transfermarkt портали иқтидорли футболчининг бозор қийматини 50 миллион еврога баҳоламоқда.
