«Real» yozda Mastantuononi ijaraga berishni rejalashtirmoqda
Madridning «Real» klubi o‘zining argentinalik iqtidorli vingeri Franko Mastantuononing kelajagi borasida aniq to‘xtamga keldi. The Touchline nashrining xabar berishicha, «qirollik klubi» 18 yoshli futbolchiga muntazam o‘yin amaliyotini kafolatlash maqsadida uni yozgi transfer oynasida boshqa jamoaga ijaraga berishni rejalashtirmoqda.
Klub mutasaddilari Mastantuononing o‘sish sur’atini Endrik uchun ishlab chiqilgan maxsus dasturga qiyoslashmoqda. E’tiborli jihati shundaki, futbolchining o‘zi ham, «qaymoqranglilar» ham ijaraga berish shartnomasiga «sotib olish huquqi» bandini kiritishni istashmayapti. Mastantuono faqatgina Madridda zafar quchishni ko‘zlayotgan bo‘lsa, «Real» rahbariyati unga klubning uzoq muddatli strategik loyihasi sifatida qaramoqda.
Hozirda klub ichida ijaraga beriladigan eng ma’qul jamoa borasida muzokaralar ketayotgan bo‘lsa-da, vaziyat yozgi o‘quv-mashg‘ulot yig‘inlari va jamoaga kelishi kutilayotgan yangi bosh murabbiyning qaroriga qarab o‘zgarishi mumkin.
Franko Mastantuono joriy mavsumda barcha turnirlarda jami 24 ta uchrashuvda maydonga tushib, 3 ta gol va 1 ta golli uzatmani o‘z hisobiga yozdirib qo‘ydi. Uning Madrid klubi bilan shartnomasi 2031 yilning iyuniga qadar imzolangan. Transfermarkt portali iqtidorli futbolchining bozor qiymatini 50 million yevroga baholamoqda.
