«Реал» раҳбарияти Вальверде ва Чуаменига «максимал даражада» жазо беришини маълум қилди
Мадриднинг «Реал» клуби ярим ҳимоячилари Федерико Вальверде ва Аурельен Чуамени ўртасида юз берган муштлашувга нисбатан зудлик билан муносабат билдирди. «Қироллик клуби» кўплаб жамоадошлари гувоҳлигида содир бўлган ушбу кўнгилсиз воқеадан сўнг ҳар икки футболчи ҳам «оғир жаза»га тортилишини очиқлади. Бу ҳақда Cadena Ser нашри хабар бермоқда.
«Бу мумкин бўлган энг юқори даражадаги жаза бўлади», — дея маълум қилган нашр манбалари.
Хабарда таъкидланишича, «Реал» раҳбарияти Вальверде ва Чуаменига нисбатан интизомий чораларни қўллаб улгурган.
Аввалроқ ОАВда тарқалган маълумотларга кўра, Вальверде ўзаро низодан сўнг ярашиш ниятида бўлган Чуамени билан қўл бериб кўришишдан бош тортган. Бунинг ортидан футболчилар ўртасида яна жанжал келиб чиққан ва оқибатда уругвайлик футболчининг боши ёрилган эди.
