«Real» раҳбарияти Мбаппедан норози — COPE
Мадриднинг «Real» клуби мутасаддилари ҳужумчи Килиан Мбаппе борасида ўз кутганларига эриша олмаётганликларини билдиришмоқда. COPE нашрининг хабар беришича, клубдагилар Мбаппени жамоанинг ҳақиқий етакчиси сифатида кўришни исташган, бироқ ҳозирча вазият бошқача тус олмоқда.
Манбанинг маълум қилишича, франциялик юлдуз на кийим алмаштириш хонасида ва на майдонда бошқа футболчилар учун етакчи бўла олган. «Қаймоқранглилар» раҳбарияти Мбаппенинг жамоага мослашиш даври бираз қийин кечишини тахмин қилган эдилар, бироқ вақт ўтиши билан у ўзини кўрсатиб, жамоани ортдан эргаштиришига ишонишган. Афсуски, ҳозирча бу умидлар оқланмаяпти.
Ҳозирда Килиан Мбаппе чап оёғидаги ярим пай мушагининг жароҳати сабабли тикланиш жараёнини ўтамоқда. Шу сабабли у 3-май куни Испания Ла Лигасининг 34-тури доирасидаги «Espanyol»га қарши учрашувни ўтказиб юборади.
Тиббий штабнинг прогнозларига кўра, ҳужумчи 10 май куни бўлиб ўтадиган «Barcelona»га қарши принципиал учрашув — «El-Clasico»га қадар тайёр бўлиши мумкин.
Мбаппенинг жароҳатидан сўнг майдонга қайтиши ва энг муҳим баҳслардаги ҳаракати унинг клубдаги келажакдаги мавқеи ҳамда мухлислар билан муносабатини белгилаб берувчи муҳим омил бўлиши кутилмоқда.
