«Реал» мухлислари Килиан Мбаппениинг ҳаракатларидан норози
Мадриднинг «Реал» клуби ишқибозлари жамоа ҳужумчиси Килиан Мбаппениинг мавсум қизғин паллага кирган бир вақтда Италияда дам олаётганига кескин муносабат билдиришди. Le Parisien нашрининг хабар беришича, футболчи жароҳатидан тўлиқ тикланиш ўрнига актриса Эстер Экспозито билан вақт ўтказмоқда.
1 май куни Италия телеканалларидан бири жуфтликнинг Кальяри шаҳридаги ресторанлардан бирида тушган тасвирларини намойиш этди. Мухлисларнинг ғазабига сабаб бўлган асосий жиҳат — Мбаппениинг жиддий жароҳат билан Сардинияда ҳордиқ чиқараётганидир. Манбаларга кўра, ушбу жароҳат сабаб ҳужумчи 10 май куни бўлиб ўтадиган «Барселона»га қарши «Эль-Класико» баҳсини ўтказиб юбормаслиги эҳтимоли жуда юқори.
Ижтимоий тармоқларда «қироллик клуби» мухлислари Мбаппениинг хатти-ҳаракатларини «йўл қўйиб бўлмас ҳолат» деб аташмоқда. Кўпчиликнинг фикрича, футболчига «клуб тақдири қизиқ эмас». Ишқибозлар Франция терма жамоаси сардорини жамоанинг сўнгги муваффақиятсиз натижалари фонида ўзини тийишга ва бор эътиборини жароҳатини даволашга қаратиришга чақиришмоқда.
Килиан Мбаппе 2026 йил 24 апрел куни Испания чемпионати доирасидаги «Бетис»га қарши ўйинда чап оёғининг тизза ости пайини жароҳатлаб олган эди. Мбаппениинг «Элита» сериали орқали машҳурликка эришган испан актрисаси Эстер Экспозито билан муносабатлари ҳақидаги хабарлар жорий йилнинг март ойида пайдо бўлган эди.
Ҳозирча клуб раҳбарияти ва футболчининг ўзи ушбу танқидлар бўйича расмий муносабат билдиргани йўқ. Бироқ муҳим ўйинлар арафасида юзага келган ушбу вазият Мбаппениинг мухлислар билан муносабатига салбий таъсир кўрсатиши мумкин.
