«Real Madrid»да сардорлик масаласида ички норозилик юзага келди
Мадриднинг «Реал» клубининг бир нечта футболчилари жамоада сардорни тайинлаш тамойилларини ўзгартириш истагини билдиришди. Айни дамда клубда сардорлик боғичи жамоада энг узоқ вақт тўп сурган футболчига берилади. Бироқ жамоанинг барча аъзолари ҳам ушбу ёндашувга рози эмас. Бу ҳақда AS нашри хабар бермоқда.
Ҳозирда «Реал»да сардорларни тайинлашда стаж (жамоада қанча вақт ўйнагани) тамойили қўлланилади. Шунга қарамай, бир қатор ўйинчилар ушбу қоидани бекор қилишни ва «Барселона» намунасисидаги гибрид тизимга ўтишни таклиф қилмоқдалар. Мазкур тизим ҳам стажни, ҳам кийиниш хонасидаги овоз бериш жараёнини ўз ичига олади. Бир нечта футболчилар ушбу ташаббусни қўллаб-қувватламоқда.
Манбанинг маълумотларига кўра, мазкур масала атрофидаги таранглик ярим ҳимоячилар Орелиен Чуамени ва Федерико Вальверде ўртасидаги можародан сўнг янада яққол кўриниб қолган.
Хабар қилинишича, жамоа сардори саналган ҳимоячи Даниэль Карвахал можародан сўнг стадионни биринчилардан бўлиб тарк этган, бироқ кейинчалик клубдан бўлган қўнғироқдан сўнг, муштлашув иштирокчилари билан ўтказиладиган фавқулодда йиғилишда қатнашиш учун қайтиб келган. Бошқа вице-сардорлар — Вальверде ва Винисиус Жуниор ҳам ушбу вазиятда етарли даражада вазминлик кўрсата олмаган.
