«Реал Мадрид» Жозе Моуриньонинг трансфери учун «Бенфика»га қанча товон пули тўлаши маълум бўлди
Мадриднинг «Реал» клуби португалиялик мутахассис Жозе Моуриньони жамоага бош мураббий этиб тайинлагани сабабли Лиссабоннинг «Бенфика» клубига 15 миллион евро миқдорида компенсация тўлаб беради. Бу ҳақда TEAMtalk нашри хабар бермоқда.
Моуриньонинг лиссабонликлар билан амалдаги шартномаси 2027 йилнинг июнига қадар мўлжалланган эди. Аввалроқ «қироллик клуби» ўз расмий сайтида португалиялик мураббий билан 2029 йилнинг 30 июнига қадар давом этадиган келишув имзоланганини эълон қилган эди.
Эслатиб ўтамиз, тажрибали мутахассис муқаддам 2010-йилдан 2013-йилгача бўлган даврда ҳам «қаймоқранглилар»ни бошқарган. Ўшанда у жамоа билан Испания чемпионлиги, мамлакат Кубоги ва Суперкубогига эга чиқишга муваффақ бўлганди.
Якунланган мавсумда «Реал Мадрид» Испания чемпионатида 86 очко жамғарган ҳолда турнир жадвалида иккинчи ўринни эгаллади. Чемпионликни қўлга киритган «Барселона»дан фарқ эса саккиз очкони ташкил этди.