«Реал Мадрид» Винисиус Жуниор билан шартномани узайтириш устида фаол иш олиб бормоқда — Романо
Мадриднинг «Реал» клуби бразилиялик ҳужумчи Винисиус Жуниор билан амалдаги келишувни узайтириш устида фаол иш олиб бормоқда. Бу ҳақда таниқли журналист ва инсайдер Фабрицио Романо хабар берди.
Манбага кўра, испан клуби раҳбарияти футболчининг кўрсатаётган ўйинидан жуда мамнун. «Қаймоқранглилар» президенти Флорентино Перес бразилиялик юлдузнинг шартномани узайтиришидан шахсан манфаатдор ва бу масалага алоҳида эътибор қаратмоқда. Ҳозирда музокаралар давом этмоқда ва якуний қарор Винисиуснинг ўзига боғлиқ.
Винисиус 2018 йилнинг ёзидан буён «Реал» шарафини ҳимоя қилиб келмоқда. Жорий мавсумда ҳужумчи барча турнирлар доирасида 43 та ўйинда майдонга тушиб, 17 та гол ва 12 та голли узатмага муаллифлик қилди. Transfermarkt портали маълумотларига кўра, футболчининг айни дамдаги бозор қиймати 150 миллион еврога тенг.
