«Реал Мадрид» Гвардиоланинг кетиши ортидан Холандни сотиб олмоқчи
Мадриднинг «Реал» клуби «Манчестер Сити» ҳужумчиси Эрлинг Холанд атрофидаги вазиятни диққат билан кузатиб бормоқда. Испания клуби Пеп Гвардиола инглиз жамоасини тарк этганидан кейин норвегиялик футболчини қўлга киритиш учун ҳаракатларини фаоллаштириши мумкин. Бу ҳақда The Sun нашри хабар бермоқда.
Манба берган маълумотларга кўра, «Реал» раҳбарияти дунёнинг энг яхши ҳужумчиларидан бири фаолиятида ўзгариш қилиш ҳақида ўйлаётганининг ҳар қандай белгисидан унумли фойдаланишга тайёр.
Маълум қилинишича, Гвардиоланинг кетиши расман эълон қилинишигача ҳам Холанд жамоадаги ўз ролидан норози эканлигини билдирган. Бироқ ҳар қандай эҳтимолий келишув ниҳоятда мураккаб кечиши аниқ. Боиси норвегиялик ҳужумчи 2025 йилнинг январ ойида «Манчестер Сити» билан 2034 йилгача мўлжалланган янги узоқ муддатли шартнома имзолаган эди.
Шунга қарамай, Испаниядаги манбалар мураббий алмашиши футболчининг келажакдаги режаларига жиддий таъсир кўрсатиши мумкин деб ҳисобламоқда. Агар Холанд «Манчестер Сити»ни тарк этишга қарор қилса, «Реал» унга ҳар томонлама манфаатли шартлар таклиф қилишга тайёр.
