\"Real Madrid\" футболчилари Жаҳон чемпионатлари тарихида рекорд ўрнатишди
Англия терма жамоаси ҳамда Мадриднинг "Real" клуби ярим ҳимоячиси Жуд Беллингем ЖЧ-2026 турнирининг 3-ўрини учун кечган Франция (6:4) билан ўйинда ўз номини таблога ёздириб қўйди. Шу тариқа, "қироллик клуби" футболчилари томонидан Жаҳон чемпионатлари тарихида киритилган голлар сони 100 тага етди ва бу мутлақ рекорд ҳисобланади. Бу ҳақда X ижтимоий тармоғидаги OptaJoe саҳифаси хабар бермоқда.
Мазкур баҳсда "Real" аъзоларидан, шунингдек, Франция терма жамоаси ҳужумчиси Килиан Мбаппе ҳам гол уришга муваффақ бўлди. У ўйинда ўз ҳисобига дубл расмийлаштирди.
Эътиборли жиҳати, Англия миллий терма жамоаси ўз тарихида илк бор Жаҳон чемпионатининг бронза медалларини қўлга киритди. Умумий ҳисобда эса бу инглизлар учун дунё биринчиликларидаги иккинчи медал бўлди — 1966-йили Англия ўз уйидаги турнирда олтин медалларга эга чиққан эди.
Эслатиб ўтамиз, ЖЧ-2026 финалида Испания ва Аргентина терма жамоалари ўзаро тўқнаш келишади. Ҳал қилувчи баҳс бугун, 19-июль куни Тошкент вақти билан соат 00:00 да старт олади.
