“Реал Мадрид” афсонаси Дани Карвахал “Хетафе”га ўтди
Мадриднинг “Реал” клуби собиқ сардори Дани Карвахал фаолиятини Испаниянинг “Хетафе” жамоасида давом эттиради. 34 ёшли ҳимоячи янги клуби билан шартнома имзолади. Бу ҳақда инсайдер Фабрицио Романо хабар бермоқда.
Манбага кўра, Карвахал эркин агент сифатида “Хетафе” сафига қўшилган. Футболчи тиббий кўрикдан муваффақиятли ўтган ва томонлар 2027-йил июнигача мўлжалланган шартнома бўйича келишувга эришган. Ла Лига раҳбарияти ҳам трансферни амалга оширишга расман рухсат берган.
Аввалроқ Карвахалнинг “Хетафе”га ўтиши молиявий чекловлар сабаб кечикаётгани хабар қилинганди. Клубнинг маошлар учун белгиланган лимитдан ошиб кетгани келишувни расмийлаштиришга тўсқинлик қилган. Бироқ клуб президенти Анхел Торреснинг молиявий кафолати ортидан муаммо ҳал этилиб, трансферга йўл очилган.
Маълумот учун, Дани Карвахал 2013–2026-йиллар давомида “Реал Мадрид”нинг асосий жамоасида тўп сурган. У мадридликлар сафида 451 та учрашувда майдонга тушиб, 14 та гол урган. Ҳимоячи клуб билан жами 27 та соврин, жумладан, олти марта УЕФА Чемпионлар лигаси бош совринини қўлга киритган.
