«Реал» Чуамени билан шартномани узайтирмоқчи — Footmercato
Мадриднинг “Реал” клуби таянч ярим ҳимоячиси Орелен Чуамени катта эҳтимол билан клуб билан меҳнат шартномасини узайтиради. Бу ҳақда Footmercato хабар бермоқда.
Футболчи Мадрид жамоасини тарк этишни режалаштирмаяпти, “қаймоқранглилар” унга янги шартнома таклиф қилиш ниятида. “Реал”нинг мураббийлар штаби Чуаменини лойиҳанинг муҳим қисми сифатида кўрмоқда. Таъкидланишича, “қаймоқранглилар” ярим ҳимоячининг маошини ҳам сезиларли даражада оширишга тайёр.
Жорий мавсумда франциялик футболчи барча мусобақаларда 45 та ўйинда майдонга тушиб, иккита гол ва иккита голли узатма муаллифига айланди. Футболчининг клуб билан амалдаги меҳнат шартномаси 2028 йилнинг ёзига қадар мўлжалланган. Transfermarkt порталида тақдим этилган маълумотларга кўра, футболчининг бозор қиймати 75 миллион еврони ташкил қилади.
