Равшан Ҳайдаров: «Осиё кубогига икки ёш кичик таркиб билан борамиз»
Ўзбекистон U-21 терма жамоаси Осиё кубогига тайёргарликни давом эттирмоқда. Бош мураббий Равшан Ҳайдаров йиғин, тайёргарлик ва навбатдаги ўртоқлик ўйинлари хусусида фикр билдирди.
"Осиё кубогига тайёргарлигимизнинг илк босқичи Тошкентда бўлиб ўтмоқда. Олдимизда 2 ҳафталик тайёргарлигимиз бор эди ва унинг биринчи ҳафтаси якунига етмоқда. Асосий урғу футболчиларнинг жисмоний тайёргарлигига қаратилди. Сафимизда оғир мавсумни ўтказган ўйинчилар бор. Улар ҳар хил ҳолатда келишган. Ҳозирда уларнинг ҳолати ўзига келтириш билан шуғулланяпмиз.
Тайёргарликнинг иккинчи босқичи доирасида 2 та ўртоқлик ўйинимиз бор. Иордания ва Қатар U23 терма жамоаларига қарши ўйинларда иштирок этамиз. Бу баҳслар ўйинимизни шакллантиришга ёрдам беради.
Осиё кубогига 2028 йилги Олимпиадада иштирок этиши мумкин бўлган футболчилар билан йўл оламиз. Биз ўзимиздан 2 ёш катта футболчиларга қарши ўйнасак ҳам кейинги олимпия циклига шаклланган ҳолда тажриба тўплаб боришни мақсад қилганмиз", — деди Ҳайдаров.
