Расман: Зинедин Зидан Франция терма жамоаси бош мураббийи этиб тайинланди
Франция футбол федерацияси афсонавий футболчи ва мураббий Зинедин Зидани мамлакат миллий терма жамоаси бош мураббийи этиб тайинлади. У ушбу лавозимда 14 йил давомида жамоани бошқарган Диде Дешамнинг ўрнини эгаллади.
54 ёшли мутахассис 2021-йилда “Реал Мадрид”ни тарк этганидан буён илк бор мураббийлик фаолиятига қайтмоқда. Зидан Франция терма жамоасини 2028-йилги Европа чемпионати ҳамда 2030-йилги Жаҳон чемпионатига тайёрлайди. Унинг илк расмий учрашувлари сентябрь ойида УЕФА Миллатлар Лигаси доирасида бўлиб ўтади.
Маълумот учун, Зинедин Зидан мураббий сифатида “Реал Мадрид” билан кетма-кет уч марта УЕФА Чемпионлар Лигасида ғолиб чиққан тарихдаги илк мутахассис ҳисобланади. Шунингдек, у мадридликлар билан икки марта Испания чемпиони, икки марта УЕФА Суперкубоги ва икки марта Клублар ўртасидаги Жаҳон чемпионатида зафар қучган.
