Расман: «Ювентус» Кенан Йилдиз билан шартномани 2030 йилгача узайтирди
Туриннинг «Ювентус» клуби турк ҳужумчи Кенан Йилдиз билан амалдаги келишувни 2030 йилга қадар узайтирди. Бу ҳақда Италия клуби ўзининг расмий сайтида маълум қилди.
Аввалроқ матбуотда тарқалган хабарларга кўра, янги шартномага биноан 20 ёшли форварднинг маоши Турин жамоасидаги энг юқори маошлардан бирига айланади.
Кенан Йилдиз 2022 йилнинг ёзида эркин агент мақомида Мюнхеннинг «Бавария» клубидан «Ювентус» ёшлар жамоасига кўчиб ўтган эди. Жорий мавсумда иқтидорли вингер барча мусобақаларда жами 31 та ўйинда майдонга тушиб, 9 та гол ва 8 та самарали узатмани ўз ҳисобига ёздириб қўйди.
Айни дамда «Ювентус» Италия Серия А турнир жадвалида 45 очко билан тўртинчи ўринни эгаллаб турибди. Чемпионатда Миланнинг «Интер» клуби 55 очко билан пешқадамлик қилмоқда.
