Расман: Юльманн – «Атлетико» футболчиси
Мадриднинг «Атлетико» клуби «Спортинг» ярим ҳимоячиси Мортен Юльманн билан шартнома имзолаганини расман эълон қилди.
Испан клуби матбуот хизмати маълумотига кўра, 27 ёшли даниялик футболчи билан 2031 йилнинг ёзига қадар мўлжалланган беш йиллик шартнома тузилди.
Трансфернинг кафолатланган қиймати 40 миллион еврони ташкил этди. Шунингдек, келишувга яна 5 миллион евролик бонуслар ҳам киритилган. Юльманн тиббий кўрикдан ҳам муваффақиятли ўтгани қайд этилди.
Мортен Юльманн 2023 йилнинг ёзидан буён Лиссабоннинг «Спортинг» клуби сафида тўп суриб келаётган эди.
У 2025/2026 йилги мавсумда португалияликлар сафида барча мусобақаларда 45 та учрашувда иштирок этиб, 3 та гол урди ва 6 та голли узатмани амалга оширди.
Transfermarkt маълумотларига кўра, футболчининг бозор қиймати 45 миллион еврони ташкил этади.
