Расман: Витор Перейра — «Ноттингем Форест»нинг янги бош мураббийи
Англиянинг «Ноттингем Форест» клуби ўз расмий сайтида Витор Перейрани жамоа бош мураббийи этиб тайинланганини эълон қилди. 57 ёшли португалиялик мутахассис «ўрмончилар» билан 2027/2028 йилги мавсум якунига қадар мўлжалланган меҳнат шартномасини имзолади.
Перейра «Вулверхэмптон»даги фаолияти орқали Англия чемпионати талаблари билан аллақачон таниш. Мураббий «бўрилар» қароргоҳини ноябр ойида, клуб тизимида бир йилдан камроқ вақт ишлаганидан сўнг тарк этган эди.
Перейра жорий мавсумда «Ноттингем Форест»ни бошқарадиган тўртинчи мураббийга айланди. Аввалроқ жамоа билан Нуну Эшпириту Санту, Ангелос Постекоглу ва Шон Дайч ишлаган эди.
Айни дамда жамоа Премьер-лига турнир жадвалида 17-ўринни эгаллаб турибди. Хавфли ҳудуддан (лигадан чиқиб кетиш зонаси) фарқ бор-йўғи уч очкони ташкил этмоқда, бу эса клуб эгаларини элита дивизионидаги ўрнини сақлаб қолиш учун кескин чоралар кўришга мажбур қилди. Португалиялик мутахассис ўз вазифасини бажаришга дарҳол киришади.
