Расман: «Тоттенҳем» Маркос Сенеси трансфери расман эълон қилинди
Лондоннинг «Тоттенҳем» клуби аргентиналик ҳимоячи Маркос Сенеси жамоага келиб қўшилганини расман маълум қилди. Футболчи «Борнмут» билан амалдаги шартномаси якунга етгач, 1 июлдан эътиборан эркин агент мақомида лондонликлар сафига бориб қўшилади.
««Тоттенҳем» футболчисига айланиш — мутлақо ўзгача туйғу.
Клуб музокараларнинг илк куниданоқ мени ўз сафида нега кўрмоқчи эканлигини ва бу ерда қурилаётган янги лойиҳанинг муҳим бўлагига айланишимни қанчалик истаганини кўрсата билди. Бу жуда ҳаяжонли ва мен тезроқ жараёнга киришишни сабрсизлик билан кутяпман.
Майдонга тушадиган ҳар бир ўйинимда мухлислар мен билан фахрланишлари ва клуб ўзига муносиб бўлган юқори ўринларга қайтиши учун бор кучимни ишга соламан. «Тоттенҳем» билан бирга ғалаба қозонишни истайман ва буни амалга ошириш учун қўлимдан келган барча ишни қиламан», — дея Сенесининг сўзларини келтирмоқда клуб расмий сайти.
Маълумот учун, Сенеси профессионал фаолиятини «Фейеноорд» клубида бошлаган бўлиб, 2022 йили 15 миллион евро эвазига «Борнмут»га кўчиб ўтган эди. «Гилослар» сафида ўтган вақт давомида аргентиналик ҳимоячи жами 128 та учрашувда майдонга тушиб, 6 та гол ва 10 та голли узатмага муаллифлик қилган.