Расман: Шўртан Суперлигадан чиқиб кетди. Жамоа энди янги босқичга қадам қўяди
Ўзбекистон футболи олий дивизиони — Суперлигада навбатдаги мавсум якунлашиш арафасида, айрим жамоаларнинг тақдири ҳам аниқ бўлиб бормоқда. Ғузорнинг «Шўртан» клуби 27-тур якунлари ортидан элитага қолиш имкониятини йўқотди. Шу тариқа, жамоанинг жорий мавсумдан сўнг Суперлигадан чиқиб кетиши расман маълум бўлди.
Чемпионат якунига уч тур қолган бўлса-да, «Шўртан» учун бу ўйинлар энди вазиятни ўзгартиролмайди. Ҳозирча жамоа турнир жадвалининг қуйи қисмида жойлашган ва уларнинг ҳисобида 15 очко мавжуд. Назарий жиҳатдан қолган учта ўйинда ғалаба қозонилса ҳам, «Шўртан»нинг умумий очколари 24 тага етади.
Бироқ бу рақам ҳам жамоани элитага сақлаб қолиш учун етарли эмас. Сабаби, ҳозирда 24 очкога эга «Хоразм» жамоаси ўзаро ўйинларда устунликка эга. Хусусан, хоразмлик футболчилар мавсум давомида «Шўртан»ни икки марта мағлуб этишган. Шу боис, ҳатто очколар тенг бўлса ҳам, Ғузор жамоаси пастки поғонада қолаверади.
Шу тариқа, «Шўртан» Суперлигадагӣ иштирокини якунлаб, келаси мавсумдан бошлаб Про-лигада ўйнайди.
Ғузор жамоаси сўнгги йилларда юқори лигада барқарор натижаларни қайд эта олмаётган эди. Мавсум давомида бир неча мураббий алмашган, таркибда эса етакчи футболчилар жароҳат ва бошқа сабабларга кўра мунтазам ўйин амалиётига эга бўла олмаган. Бу эса натижаларга салбий таъсир кўрсатди.
Шунга қарамай, «Шўртан» футболчилари сўнгги турларда ҳам курашдан воз кечишмади. Клуб мухлислари ўз жамоасини қўллаб-қувватлашда давом этмоқда. Маҳаллий футбол ихлосмандлари «Шўртан»нинг бой тарихига ва жамоанинг қайтиш салоҳиятига ишонишмоқда.
Эслатиб ўтамиз, «Шўртан» бир пайтлар Суперлигада ўзининг иродали ўйинлари билан танилган, ҳатто йирик клубларга қарши кутилмаган натижалар қайд этган жамоа сифатида эсда қолган. Эндиликда Ғузор вакилларини янги синов — Про-лигадагӣ курашлар кутмоқда.
Клуб раҳбарияти сўзларига кўра, жамоа энди янги босқичга қадам қўймоқда. Яқин орада таркиб янгиланиши, инфратузилма мустаҳкамланиши ва маҳаллий ёш футболчиларга кенгроқ имконият берилиши режалаштирилган. Асосий мақсад — «Шўртан»ни қайта тиклаб, тез орада Суперлигага қайтаришдир.
