Расман: Шон Стейр «Ньюкасл» футболчисига айланди
«Ньюкасл» 18 ёшли нидерландиялик ярим ҳимоячи Шон Стейрнинг «Аякс»дан трансферини расман эълон қилди.
Футболчи Англия клуби билан беш йиллик шартнома имзолади. Трансфер суммаси ошкор этилмаган. Стейр янги жамоасида 14-рақам остида ҳаракат қилади.
У «Ньюкасл»нинг ушбу ёздаги учинчи янги футболчисига айланди. Ундан аввал клуб француз дарвозабони Эвен Жауэн ва кот-д'ивуарлик вингер Базуман Турени ўз сафига қўшиб олган эди.
Ўтган мавсумда Стейр «Аякс» академиясининг энг яхши ёш истеъдодига бериладиган Абделҳак Нури мукофотини қўлга киритган.
«Бу ерга келганимдан жуда бахтлиман. "Ньюкасл" — Премьер-лиганинг улкан клубларидан бири. Дунёнинг энг кучли чемпионатида ўйнаш менинг орзум эди. "Аякс"да ўзимни уйдагидек ҳис қилардим, чунки у ерга етти ёшимда келганман. Аммо сенга "Ньюкасл"дек клуб қизиқса, рад этиш жуда қийин», — деди Стейр клуб матбуот хизматига.
