Расман: Рахим Стерлинг ўзаро келишувга кўра «Челси» билан шартномани бекор қилди
Лондоннинг «Челси» клуби ўз расмий сайтида яримҳимоячи Рахим Стерлинг билан амалдаги шартнома бекор қилинганини эълон қилди.
«Рахим Стерлинг бугун ўзаро келишувга кўра «Челси» футбол клубини тарк этди. У 2022 йилнинг ёзида «Манчестер Сити»дан кўчиб ўтганидан буён жамоамиз сафида уч ярим мавсум давомида тўп сурди. Биз Рахимга «Челси» футболчиси сифатида қўшган ҳиссаси учун миннатдорчилик билдирамиз ва унинг фаолиятидаги кейинги босқичда муваффақиятлар тилаймиз», — дейилади лондонликлар баёнотида.
Маълумот учун, 31 ёшли футболчи жорий мавсумда «аристократлар» таркибида бирорта ҳам ўйинда майдонга тушмади. У асосий жамоадан четлатилган ҳолда, алоҳида машғулот ўтказиб келаётган эди. Ваҳоланки, унинг клуб билан шартномаси 2027 йилнинг июнигача давом этиши керак эди. Эслатиб ўтамиз, Стерлинг ўтган мавсумни ижара асосида «Арсенал»да ўтказган эди.
