Расман: Рафаэль Бенитес «Панатинаикос»ни тарк этди

Грециянинг «Панатинаикос» клуби бош мураббий Рафаэль Бенитес истеъфога чиқарилганини эълон қилди. Испаниялик тажрибали мутахассис жамоани 2025 йилнинг октябр ойида қабул қилиб олганди.

«Ҳаммаси учун раҳмат, Мистер. Келгуси фаолиятингизда омад тилаймиз», — дейилади Греция клубининг X ижтимоий тармоқдаги расмий саҳифасида.

Якунланган мавсум натижасига кўра, «Панатинаикос» Греция чемпионати турнир жадвалида 52 очко билан 4-ўринни эгаллади ва чемпион бўлган «АЕК»дан нақд 20 очко орқада қолиб кетди.

Маълумот учун, 66 ёшли Бенитес ўз фаолияти давомида «Валенсия» билан икки марта Испания чемпионлиги ва УЕФА Кубогини ютган. Шунингдек, у 2004–2010 йилларда «Ливерпуль»ни бошқариб, 2004/2005 йилги мавсумда афсонавий тарзда ЁЧЛ ғолиби бўлган эди.

Насрулло Каримов

Журналист