Rasman: Rafael Benites «Panatinaikos»ni tark etdi
Gretsiyaning «Panatinaikos» klubi bosh murabbiy Rafael Benites isteʼfoga chiqarilganini eʼlon qildi. Ispaniyalik tajribali mutaxassis jamoani 2025 yilning oktyabr oyida qabul qilib olgandi.
«Hammasi uchun rahmat, Mister. Kelgusi faoliyatingizda omad tilaymiz», — deyiladi Gretsiya klubining X ijtimoiy tarmoqdagi rasmiy sahifasida.
Yakunlangan mavsum natijalariga koʻra, «Panatinaikos» Gretsiya chempionati turnir jadvalida 52 ochko bilan 4-oʻrinni egalladi va chempion boʻlgan «AEK»dan naqd 20 ochko ortda qolib ketdi.
Maʼlumot uchun, 66 yoshli Benites oʻz faoliyati davomida «Valensiya» bilan ikki marta Ispaniya chempionligi va UEFA Kubogini yutgan. Shuningdek, u 2004–2010 yillarda «Liverpul»ni boshqarib, 2004/2005 yilgi mavsumda afsonaviy tarzda YChL gʻolibiga aylangan edi.
