Расман: Оливье Жиру мавсум якунида фаолиятини тугатади
Франция терма жамоасининг собиқ ҳужумчиси, ҳозирда «Лилль» шарафини ҳимоя қилаётган Оливье Жиру 2026/27-йилги мавсум якунида профессионал футболчилик фаолиятини тугатишни режалаштирмоқда. 30 сентябрь куни 40 ёшни қарши оладиган тажрибали форвард учун жорий мавсум фаолиятидаги сўнггиси бўлиши кутилмоқда. Бу ҳақда L’Équipe нашри хабар бермоқда.
Манбага кўра, Жиру фаолиятининг якуний босқичига келганини англаб тургани ва қолган ҳар бир учрашувдан завқ олишга ҳаракат қилаётганини таъкидлаган. Франциялик ҳужумчи профессионал футболдаги 22-мавсумини ўтказмоқда ва катта эҳтимол билан мавсум тугагач, бутсаларини михга илиб қўяди.
Жиру «Лилль» сафига 2025 йил ёзида келиб қўшилган, 2026 йил июнида эса клуб билан шартномасини яна бир мавсумга узайтирган эди. Фаолияти давомида у «Арсенал», «Челси», «Милан», «Лос-Анжелес» ва «Монпелье» каби клубларда тўп тепган, шунингдек, Англия, Италия ва Францияда йирик совринларни қўлга киритган.
Маълумот учун, Оливье Жиру Франция терма жамоаси сафида 137 та учрашув ўтказиб, 57 та гол урган. У 2018 йилда «уч ранглилар» билан жаҳон чемпиони бўлган ва 2024 йилда халқаро фаолиятини якунлаган. Ҳозирда Жиру Франция терма жамоаси тарихидаги энг яхши тўпурарлар рўйхатида Килиан Мбаппеден кейин иккинчи ўринда турибди.
