Расман: «Монца» А Серияга қайтди
Италия А Сериясига йўлланма берувчи плей-офф босқичининг жавоб учрашуви якунланди. Унда «Монца» ва «Катандзаро» жамоалари ўзаро баҳс олиб боришди. «Ю-Пауэр» стадионида кечган учрашувда «Катандзаро» 2:0 ҳисобида ғалаба қозонди. Жамоаларнинг дастлабки ўйинида айнан шундай ҳисоб билан «Монца» рақибидан устун келган эди.
Икки ўйин натижасига кўра ҳисоб тенг (2:2) бўлган бўлса-да, Италия чемпионатининг юқори дивизионига «бьянкоросси» («Монца») йўл олди.
Регламентга кўра, плей-оффда кучлар тенг келса, Серия Б мунтазам мавсумини юқорироқ ўринда якунлаган жамоа афзалликка эга бўлади. Якунланган мавсумда «Монца» 3-ўринни, «жанубий буғдутлар» («Катандзаро») эса 5-поғонани банд этган эди.
Учрашувнинг 39-дақиқасида Фелипе Жек ҳисобни очган бўлса, 78-дақиқада Ружеро Фрозинини меҳмонларнинг иккинчи голини киритиб, устунликни мустаҳкамлади. Бироқ бу ғалаба «Катандзаро»га элита йўлланмасини тақдим этмади.
Эслатиб ўтамиз, плей-оффнинг ўтган босқичида «Монца» «Юве Стабиа» тўсиғидан ўтган эди (2:2, 2:1). Эътиборли жиҳати, «бьянкоросси» Серия Бга тушиб кетганидан сўнг, бор-йўғи бир йил ўтиб яна Италия элитасига қайтишга муваффақ бўлди.
