Rasman: «Monza» A Seriyaga qaytdi
Italiya A Seriyasiga yoʻllanma beruvchi pley-off bosqichining javob uchrashuvi yakunlandi. Unda «Monza» va «Katandzaro» jamoalari oʻzaro bahs olib borishdi. «Yu-Pauer» stadionida kechgan uchrashuvda «Katandzaro» 2:0 hisobida gʻalaba qozondi. Jamoalarning dastlabki oʻyinida aynan shunday hisob bilan «Monza» raqibidan ustun kelgan edi.
Ikki oʻyin natijasiga koʻra hisob teng (2:2) boʻlgan boʻlsa-da, Italiya chempionatining yuqori divizioniga «byankorossi» (Monza) yoʻl oldi.
Reglamentga koʻra, pley-offda kuchlar teng kelsa, Seriya B muntazam mavsumini yuqoriroq oʻrinda yakunlagan jamoa afzallikka ega boʻladi. Yakunlangan mavsumda «Monza» 3-oʻrinni, «janubiy burgutlar» (Katandzaro) esa 5-pogʻonani band etgan edi.
Uchrashuvning 39-daqiqasida Felipe Jek hisobni ochgan boʻlsa, 78-daqiqada Rujero Frozinini mehmorlarning ikkinchi golini kiritib, ustunlikni mustahkamladi. Biroq bu gʻalaba «Katandzaro»ga elita yoʻllanmasini taqdim etmadi.
Eslatib oʻtamiz, pley-offning oʻtgan bosqichida «Monza» «Yuve Stabia» toʻsigʻidan oʻtgan edi (2:2, 2:1). Eʼtiborli jihati, «byankorossi» Seriya Bga tushib ketganidan soʻng, bor-yoʻgʻi bir yil oʻtib yana Italiya elitasiga qaytishga muvaffaq boʻldi.
