Расман: «Манчестер Сити» Жереми Монга билан шартнома имзолади
«Манчестер Сити» «Лестер Сити»нинг 17 ёшли қанот ҳужумчиси Жереми Монга билан шартнома имзолаганини расман эълон қилди.
«Шаҳарликлар» матбуот хизмати маълумотига кўра, футболчи билан тузилган битим 2031 йил ёзига қадар амал қилади.
Трансфер учун «Манчестер Сити» 10 миллион фунт стерлинг (11,7 миллион евро) тўлайди. Шунингдек, шартномада 2,5 миллион фунт (2,9 миллион евро) миқдоридаги бонуслар ҳам кўзда тутилган.
"Манчестер Сити" менга қизиқиш билдираётганини эшитган заҳотимоқ, бу мен учун тўғри танлов эканини англадим. Бу ерда бўлиш мен учун катта шараф ва жамоага қўшилганимдан жуда хурсандман", — деди Монга клуб матбуот хизматига.
2025/2026 йилги мавсумда Жереми Монга «Лестер» сафида барча мусобақаларда 30 та учрашувда иштирок этиб, 1 та гол урди ва 2 та голли узатмани амалга оширди.
Transfermarkt маълумотларига кўра, ёш вингернинг бозор қиймати 15 миллион еврони ташкил этади.
