Расман: Килиан Мбаппе «Реал»да мавсумнинг энг яхши футболчиси деб топилди
Мадриднинг «Реал» клуби ўзининг расмий сайтида 2025/2026 йилги мавсум якунларига кўра жамоанинг энг яхши футболчиси номини эълон қилди. Ушбу нуфузли мукофот «қаймоқранглилар»нинг франциялик ҳужумчиси Килиан Мбаппега насиб этди. Эътиборли жиҳати, истеъдодли форвард Мадрид клубида кетма-кет иккинчи мавсумдирки тенгсиз деб топилмоқда ва жамоа муваффақиятларига улкан ҳисса қўшишда давом этмоқда.
Мбаппе якунланган Испания Ла Лигасида рақиблар дарвозасини 25 бор ишғол этган ҳолда турнирнинг энг яхши тўпурарига айланди. Шунингдек, у жорий мавсумдаги УЕФА Чемпионлар Лигаси баҳсларида ҳам 15 та гол уриб, турнир голадорлари рўйҳатида пешқадамлик қилмоқда. Килиан Мбаппе ўтган мавсум давомида «Қироллик клуби» сафида жами 44 та учрашувда майдонга тушди ва ўз ҳисобига 42 та гол ёздириб қўйишга муваффақ бўлди.
Франциялик юлдуз мавсум давомида тўрт марта «Реал»да ойнинг энг яхши футболчиси деб эътироф этилди. Гарчи жароҳати сабабли мавсум охиридаги бир нечта муҳим ўйинларни ўтказиб юборишга мажбур бўлган бўлса-да, унинг қайд этган умумий кўрсаткичлари ушбу юксак эътирофга лойиқ кўрилиши учун тўлиқ кифоя қилди.
