Расман: Илёс Зейтуллаев “Бунёдкор” билан хайрлашди
Илёс Зейтуллаев “Бунёдкор”даги фаолиятини якунлади. Мутахассис ижтимоий тармоқдаги саҳифасида Тошкент клуби билан хайрлашув постини эълон қилиб, жамоада ўтказган даври ҳақида фикр билдирди. Аввалроқ ОАВда унинг клубни тарк этгани ҳақида хабарлар тарқалган эди.
Зейтуллаев хайрлашув мурожаатида ҳар бир нарсанинг ўз вақти борлигини таъкидлаб, “Бунёдкор” билан босиб ўтган йўли унинг ҳаётида муҳим из қолдирганини қайд этди. Мураббий клубдаги футболчилар, мураббийлар штаби ва бирга ишлаган барча инсонларга миннатдорлик билдирди.
Мутахассиснинг кетиши “Бунёдкор”даги мураккаб вазият фонида юз берди. Сўнгги ҳафталарда жамоа молиявий ва ташкилий муаммоларга дуч келган, Зейтуллаев эса бир неча бор клубдаги вазият ҳақида очиқ гапирган эди. Унинг уч нафар италиялик ёрдамчиси ҳам аввалроқ жамоани тарк этган.
Маълумот учун, Зейтуллаев “Бунёдкор”да уч мавсум давомида фаолият олиб борди. У сўнгги матбуот анжуманларидан бирида айнан шу давр мобайнида жамоа шакллантирилгани, бироқ сўнгги воқеалар сабаб таркибнинг парчаланиб бораётганини оғриқ билан таъкидлаган эди.
