Расман: Дро Фернандес — «ПСЖ» футболчиси
«Барселона» академияси тарбияланувчиси Дро Фернандес фаолиятини Франциянинг «Пари Сен-Жермен» клубида давом эттиради. Бу ҳақда Париж клуби расмий сайти хабар берди.
18 ёшли испаниялик футболчи «ПСЖ» билан 2030 йилга қадар мўлжалланган шартнома имзолади. У янги жамоасида 27-рақам остида ҳаракат қилади.
Фернандес «Барселона» академиясининг барча босқичларидан ўтган ва 2025 йилда асосий жамоа сафида дебют қилган. Жорий мавсумда у каталонияликлар таркибида беш учрашувда майдонга тушиб, битта голли узатма муаллифи бўлди.
Шунингдек, футболчи халқаро майдонда Испаниянинг турли ёш тоифасидаги терма жамоаларига мунтазам равишда жалб этиб келинмоқда.
Франция чемпионатининг 19-туридан сўнг «ПСЖ» 45 очко жамғарган ҳолда турнир жадвалида етакчилик қилмоқда.
