Расман: Дармиан «Болонья» футболчисига айланди
«Болонья» ҳимоячи Маттео Дармиан билан шартнома имзолаганини расман маълум қилди. Келишув 2027 йил 30 июнга қадар амал қилади.
35 ёшли футболчи «Милан» академияси тарбияланувчиси ҳисобланади. У Италия А Сериясидаги дебютини 2006/07 мавсумда «Милан» сафида ўтказган. Дармиан фаолияти давомида «Падова», «Палермо», «Торино», «Манчестер Юнайтед», «Парма» ва «Интер» клубларида ҳам тўп тепган. У ўтган ёзда «Интер»ни эркин агент сифатида тарк этган эди.
Дармиан Италия терма жамоасидаги дебютини 2014 йилда ўтказган ва шу йили Бразилияда бўлиб ўтган Жаҳон чемпионатида иштирок этган. У миллий жамоа сафида 40 дан ортиқ учрашув ўтказган.
Клуб миқёсидаги совринлари орасида Италия чемпионлиги, Италия Кубогининг икки мартаги ғолиблиги, Италия Суперкубоги, Англия Кубоги, Англия Лига Кубоги ва Европа Лигаси ғолиблиги бор.
«Болонья» клуби Дармианнинг кучли жиҳатлари сифатида техникаси, позиция танлаши, тактик саводхонлиги, барқарорлиги ва ўйинни яхши ўқиш қобилиятини қайд этди.
