Расман: «Челси» ва Бразилия миллий жамоаси собиқ юлдузи Оскар 34 ёшида фаолиятини якунлади
Бразилия миллий жамоасининг собиқ яримҳимоячиси, сўнгги вақтларда «Сан-Паулу» шарафини ҳимоя қилаётган Оскар 34 ёшида футболчилик фаолиятига нуқта қўйди. Бу ҳақда «Сан-Паулу» клубининг расмий сайти хабар бермоқда.
«Мен «Сан-Паулу» учун кўпроқ фойда келтиришни ва ўйнашда давом этишни режалаштирган эдим. Ўйлайманки, менда футболчилик қобилияти ҳам, фаолиятимни давом эттириш учун мос ёш ҳам бор эди, аммо афсуски, шундай бўлиб чиқди. Энди мен фаолиятимни якунлаб, «Сан-Паулу»га мухлис сифатида далда бериб тураман.
Фаолиятимни айнан мени дунёнинг кўплаб нуқталарига етаклаган «Сан-Паулу»да якунлаяпман. Доимий меҳр-муҳаббат учун ҳар бир инсонга, қайтганимдан буён ва ҳозирги қийин дамларда мени қўллаб-қувватлаётган барча «Сан-Паулу» мухлисларига миннатдорчилик билдираман», — деди Оскар.
Эслатиб ўтамиз, ўтган йилнинг 11 ноябрь куни футболчи машғулот марказидаги режали тиббий кўрик пайтида ҳушидан кетган эди. Шунингдек, унда юрак билан боғлиқ муаммолар аниқланган.
Оскар 2012 йилдан 2017 йилга қадар «Челси» сафида тўп сурган ва Лондон клуби билан Англия чемпионлигини қўлга киритган. Шунингдек, у фаолияти давомида «Интернасионал» ва «Шанхай Порт» клубларида ҳам ўйнаган. Оскар — «Сан-Паулу» клуби тарбияланувчиси ҳисобланади.
