Расман: «Челси» Марескани истеъфога чиқарди
Лондоннинг «Челси» клуби матбуот хизмати Энцо Маресканинг асосий жамоа бош мураббийи лавозимидан истеъфога чиқарилганини расман эълон қилди. Италиялик мутахассис «кўклар»ни 2024 йил ёзидан буён бошқариб келаётганди. Аввалроқ у «Парма» ва «Лестер» клубларида фаолият олиб борган.
««Челси» футбол клуби ва бош мураббий Энцо Мареска ўзаро ҳамкорликни тўхтатди. Клубдаги фаолияти давомида Энцо жамоани УЕФА Конференциялар лигаси ва ФИФА Клублар ўртасидаги жаҳон чемпионатидаги ғалабаларга етаклади. Ушбу ютуқлар клубнинг яқин тарихида муҳим ўрин тутади ва биз унинг клуб ривожига қўшган ҳиссаси учун миннатдорчилик билдирамиз.
Ҳозирда жамоа олдида тўртта турнир доирасида муҳим вазифалар (жумладан, Чемпионлар лигаси йўлланмаси учун кураш) турганини инобатга олган ҳолда, Энцо ва клуб мураббийлар алмашинуви мавсумни тўғри йўлга солиш учун энг мақбул қарор бўлади, деган хулосага келди. Биз Энцо Марескага келгусидаги фаолиятида омад тилаймиз», — дейилади «Челси» матбуот хизмати баёнотида.
