Расман: «Ботафого» Анчеллоттини истеъфога чиқарди
«Ботафого» клуби матбуот хизмати Давиде Анчелотти жамоа бош мураббийи лавозимини тарк этганини эълон қилди.
Эслатиб ўтамиз, Давиде — Бразилия терма жамоаси бош мураббийи Карло Анчелоттининг ўғли. Аввалроқ у отасига ёрдамчи сифатида Мадриднинг «Реал» клуби ва бошқа жамоаларда фаолият олиб борган. «Ботафого» эса унинг мустақил мураббийлик фаолиятидаги илк клуби бўлиб, у бу жамоага 2025 йил ёзида келиб қўшилганди.
Globo нашри хабарига кўра, шартноманинг бекор қилинишига италиялик мутахассиснинг жисмоний тайёргарлик бўйича мураббий Лука Герранинг ишдан бўшатилишидан норози бўлгани сабаб бўлган. Футболчилар орасида мушак жароҳатлари кўплиги айнан шу мутахассис зиммасига юкланган.
Анчелотти клуб раҳбариятига бутун мураббийлар штаби сақлаб қолинадиган бўлса, ишлашда давом этишини билдирган. Бироқ «Ботафого» раҳбарияти бу шартни қабул қилмаган.
Натижада италиялик мутахассис клубни тарк этди. Унинг бошчилигида жамоа 14 та ғалаба, 11 та дуранг қайд этиб, 7 бор мағлубиятга учради.
