Расман: «Боруссия Д» клуби спорт директори Себастьян Кель лавозимини тарк этди
Дортмунднинг «Боруссия» клуби ўз расмий сайтида спорт директори лавозимида ишлаб келаётган Себастьян Кель билан ҳамкорлик тўхтатилганини эълон қилди.
«Очиқчасига ўтказилган мулоқот давомида Себастьян Кель, Карстен Крамер ва мен ёз ойи ўзгаришлар учун энг қулай вақт деган умумий тўхтамга келдик. Ҳар икки томонга ҳам тайёргарлик кўриш учун вақт бериш мақсадида Себастьян билан шартномани дарҳол бекор қилишга ўзаро келишиб олдик. Бизни Себастьян билан узоқ йиллик тарих боғлаб туради. Нафақат «Боруссия» сафида бирга тўп сурганмиз, балки 2002 йилда биргаликда Германия чемпионлигини ҳам қўлга киритганмиз. Себастьян клубимиз ривожига улкан ҳисса қўшди ва биз унинг фидойилиги учун миннатдормиз», — дея дортмундликлар директори Ларс Риккеннинг сўзларини келтирмоқда клуб матбуот хизмати.
Себастьян Кель 2018 йилдан бошлаб тўрт йил давомида «Боруссия»нинг профессионал футболчилар бўлимига раҳбарлик қилган ва шу давр ичида клуб 2021 йилда Германия кубогини қўлга киритган эди. 2022 йилнинг ёзида собиқ футболчи спорт директори лавозимини эгаллади. Унинг фаолияти давомида Дортмунд жамоаси мунтазам равишда УЕФА Чемпионлар Лигасига йўлланма олди ва 2024 йилда турнир финалига қадар етиб борди.
Айни дамда «Боруссия Д» Бундеслига турнир жадвалида иккинчи ўринда бормоқда.
