Расман: Англиянинг бешта клуби келаси мавсумда Чемпионлар Лигасида иштирок этади
Англия Премьер-лигасининг жорий мавсум якунларига кўра, бешта инглиз клуби 2026/2027 йилги мавсумда УЕФА Чемпионлар Лигасининг умумий босқичида иштирок этиш ҳуқуқини қўлга киритади. Лондоннинг «Арсенал» жамоаси чорак финалнинг дастлабки баҳсида «Спортинг» устидан ғалаба қозониши (1:0) инглизларга Европанинг энг нуфузли турнири учун қўшимча йўлланмани нақд қилиб берди.
Маълумки, Чемпионлар Лигасининг финал босқичи иштирокчилари сони 36 тага етказилгач, УЕФА коэффициентлар жадвалида энг юқори очко жамғарган икки мамлакатга қўшимча квоталар ажратиладиган бўлди. «Арсенал»нинг ушбу муваффақияти 2025/2026 йилги мавсумда Англия клублари томонидан тўпланган очколар сонини 25,013 тага етказди. Иккинчи қўшимча йўлланма учун эса Германия ва Испания ўзаро кураш олиб боради.
Айни дамда АПЛ турнир жадвалининг бешинчи поғонасини 49 очко билан «Ливерпуль» эгаллаб турибди. Кучли бешликка кириш учун курашни, шунингдек, «Челси» (48 очко), «Брентфорд» ва «Эвертон» (46 очкодан) жамоалари ҳам давом эттирмоқда.
