Ракитич “Барселона” Чемпионлар Лигасини ютишига ишонмоқда
“Барселона”нинг собиқ футболчиси Иван Ракитич каталонияликларни 2026/27 йилги Чемпионлар Лигасининг асосий даъвогарларидан бири деб ҳисобламоқда. Хорватиялик собиқ ярим ҳимоячининг фикрича, жамоанинг ҳозирги таркиби Европанинг бош совринини қўлга киритиш учун етарли салоҳиятга эга. Бу ҳақда The Touchline хабар берди.
Ракитич “Барселона”нинг асосий устунлиги сифатида ёш ва сифатли футболчиларнинг уйғунлигини таъкидлади. Унинг фикрича, айнан жорий мавсум каталонияликлар учун Чемпионлар Лигасида муваффақиятли бўлиши мумкин.
Ракитичнинг ўзи ҳам “Барселона”нинг сўнгги Чемпионлар Лигаси ғалабасида муҳим роль ўйнаган. 2015 йилда Берлинда “Ювентус”га қарши ўтган финалда хорватиялик футболчи ҳисобни очган, каталонияликлар эса учрашувда 3:1 ҳисобида ғалаба қозонган.
Маълумот учун, “Барселона” Чемпионлар Лигаси ва Европа Чемпионлар кубогини жами беш марта — 1992, 2006, 2009, 2011 ва 2015 йилларда қўлга киритган. Жамоа ўтган мавсум турнирнинг чорак финалида “Атлетико”га имкониятни бой берган.
