Рафиньянинг жароҳати клуб ва терма жамоалар ўртасидаги зиддиятни кучайтирди
«Барселона» клуби бразилиялик ҳужумчи Рафиньянинг терма жамоа ихтиёрида жароҳат олганидан сўнг ўз эътирозларини билдирди. Бу ҳақда Marca нашри хабар бермоқда.
Клубнинг норозилигига икки та асосий сабаб кўрсатилган. Биринчидан, ўйинларнинг ўта тиғиз графиги ва тақвимнинг зичлиги. Клуб мутасаддилари мавсум якунланишига бор-йўғи икки ой қолган бир вақтда халқаро танаффус ва ўртоқлик ўйинлари нима учун кераклигини тушунмаяпти.
Иккинчи сабаб — Бразилия ва Франция ўртасидаги баҳснинг АҚШда (Бостон) ўтказилганидир. Ваҳоланки, ушбу терма жамоаларнинг аксарият футболчилари Европа клублари шарафини ҳимоя қилишади ва бундай узоқ парвозлар футболчиларнинг жисмоний ҳолатига салбий таъсир кўрсатади.
Шуни таъкидлаш жоизки, клуб футболчининг ўзига ёки Бразилия терма жамоаси бош мураббийи Карло Анчелоттига нисбатан ҳеч қандай салбий муносабат билдирмаган. Норозилик асосан ўйинлар ташкилотчиларига қаратилган.
Эслатиб ўтамиз, жума куни, 27 мартда «Барселона» Рафиньянинг ўнг оёғи сон қисмида жароҳат борлигини тасдиқлади. 29 ёшли футболчининг тикланиш муддати тахминан беш ҳафтани ташкил этиши кутилмоқда.
