Рафинья таклифларга қарамай «Барселона»да қолмоқчи
Бразилиялик яримҳимоячи Рафинья, ўзига келиб тушган манфаатли таклифларга, жумладан, Саудия Арабистонидан бўлган чорловларга қарамай, «Барселона»ни тарк этишни режалаштирмаяпти. Бу ҳақда Sport.es нашри хабар бермоқда.
Ўтган йили Рафинья «Барселона» билан шартномасини узайтирган эди, бироқ унинг шартлари жамоанинг бошқа асосий ўйинчиларига таклиф қилинганидан пастроқ ҳисобланади. Футболчи келишув шартлари қайта кўриб чиқилишидан умидвор, аммо айни дамда клуб бундай ўзгаришларга тайёр эмас.
«Барселона» ўз режаларини Рафиньянинг жамоадаги иштирокини ҳисобга олган ҳолда тузмоқда. Футболчининг эҳтимолий сотуви эса фақат келаси ёзда — унинг шартномаси тугашига бир йил қолганида кўриб чиқилиши мумкин. Шунингдек, музокаралар жараёнига ўйинчининг Бразилия терма жамоаси сафида олган жароҳати ҳам таъсир кўрсатди ва бу янги келишув муҳокамасини секинлаштирди.
Маълумот учун, Рафинья 2022-йилнинг июль ойида «Барселона» сафига келиб қўшилган эди. Transfermarkt портали футболчини 70 миллион евро га баҳоламоқда.