Рафинья: «Фаолиятимни «Барселона»да якунламоқчиман»
«Барселона» ҳужумчиси Рафинья келажагини Каталония клуби билан боғлаш ниятида эканини маълум қилди. Бразилиялик футболчи амалдаги шартномасини яна узайтиришга ва имкон қадар фаолиятининг қолган қисмини «Барселона»да ўтказишга тайёрлигини билдирди. Бу ҳақда RAC1 хабар бермоқда.
Манбага кўра, Рафинья 2028 йилгача мўлжалланган амалдаги шартномасини имзолаган пайтида 30–31 ёшга келиб жисмоний ҳолати қандай бўлишини билмаганини айтган. Бироқ янги мавсумдаги юқори спорт формаси унга яна бир неча йил юқори савияда ўйнай олишига ишонч берган. Шу сабаб футболчи «Барселона» билан ҳамкорликни янада узоқ муддатга давом эттиришга қарши эмас.
«Ҳа, шартномамни яна бироз узайтиришни ва бошқа клубга ўтмасдан фаолиятимни шу ерда якунлашни истардим», — дея Рафиньянг сўзларини келтиради манба. «Барселона» спорт директори Деку ҳам аввалроқ клуб бразилиялик ҳужумчининг ўйинидан мамнун эканини ва унинг 2028 йилдан кейинги келажаги бўйича музокара олиб боришни исташини тасдиқлаган.
Маълумот учун, Рафинья 2026/27 йилги мавсумни жуда юқори суръатда бошлади. У дастлабки 5 та учрашувнинг барчасида гол уриб, 8 та гол қайд этди, «Расинг»га қарши 7:2 ҳисобидаги баҳсда эса хет-трик муаллифига айланди ва мавсумдаги голлари сонини 11 тага етказди. Бразилиялик футболчининг «Барселона» билан амалдаги шартномаси 2028 йил 30 июнигача мўлжалланган.
