Раффаэле Палладино «Аталанта» бош мураббийлигидан истеъфога чиқарилди
Бергамонинг «Аталанта» клуби бош мураббийи Раффаэле Палладино эгаллаб турган лавозимидан озод этилди. Бу ҳақда клуб матбуот хизмати хабар бермоқда.
Италиялик мутахассис билан бирга унинг штабида фаолият юритган ассистентлари — Стефано Читтерио, Федерико Пелузо, Фабио Кораби, Никола Рива, Маттиа Казелла, Андреа Рампони ва Андреа Берти ҳам А Серия клубини тарк этган.
«Аталанта» клуби Раффаэле Палладино ва унинг штабига фидокорона меҳнати учун миннатдорчилик билдиради ҳамда келгуси фаолиятида омад тилайди», — дейилади клуб расмий сайтида эълон қилинган баёнотда.
Эслатиб ўтамиз, Палладино ўтган йилнинг ноябр ойида сербиялик Иван Юрич истеъфога чиқарилгач, «Аталанта» бошқарувини қўлга олган эди. Якунланган 2025/2026 йилги мавсумда Бергамо жамоаси Италия чемпионатини 7-ўринда якунлади.
