«ПСЖ» «МЮ»нинг трансфер мақсадини илиб кетиш учун 50 млн евро тўлашга тайёр — Caught Offside
«Манчестер Юнайтед» вингер Маркус Рэшфорднинг ўрнига «Вест Хэм» қанот ҳужумчиси Крисенсио Саммервиллни сотиб олиш вариантини кўриб чиқмоқда.
Бироқ футболчи учун белгиланган 50 млн фунт (57,5 млн евро) миқдоридаги нарх бунга тўсиқ бўлиши мумкин. Бу ҳақда Caught Offside хабар бермоқда.
Манбанинг маълумотига кўра, Саммервиллга «ПСЖ» ҳам қизиқиш билдирмоқда. Париж клуби Нидерландия терма жамоаси ўйинчисининг трансфери учун тахминан 43 млн фунт (50 млн евро) миқдоридаги таклифни тайёрламоқда. Шунингдек, Франция жамоаси «Вест Хэм» ярим ҳимоячиси Матеуш Фернандешни ҳам сотиб олишга уриниб кўриши мумкин. Бундай ҳолатда «ПСЖ» икки футболчи учун умумий ҳисобда 130 млн фунт (150 млн евро) тўлайди.
Ўтган мавсумда Саммервилл барча мусобақаларда 34 та ўйинда иштирок этиб, ўз ҳисобига еттита гол ва бешта самарали узатма ёздириб қўйди. Футболчининг клуб билан амалдаги меҳнат шартномаси 2029 йилнинг ёзигача мўлжалланган.
Transfermarkt порталида тақдим этилган маълумотларга кўра, футболчининг бозор қиймати 35 млн еврони ташкил этади.
