«ПСЖ» Гонсалу Рамушни 40 миллион еврога сотишга тайёр
Франциянинг “ПСЖ” клуби португалиялик ҳужумчи Гонсало Рамуш бўйича таклифларни кўриб чиқишга тайёр. Хабарларга кўра, парижликлар футболчини тахминан 40 миллион евро эвазига қўйиб юбориши мумкин.
25 ёшли форвард ўтган мавсумда жамоа билан муҳим совринларни қўлга киритган бўлса-да, асосий таркибда доимий ўринни кафолатлай олмади. Шу боис унинг келажаги атрофидаги муҳокамалар яна авж олмоқда.
Айни пайтда “Милан” Рамушга асосий даъвогарлардан бири сифатида кўрилмоқда. Италия клуби янги мавсум олдидан ҳужум чизиғини кучайтиришни режалаштираётган бўлиб, португалиялик тўпурарни трансфер рўйхатининг юқори қисмига қўйган. Бироқ миланликлар тўғридан-тўғри 40 миллион евро тўлаш ўрнига ижара ва кейинчалик сотиб олиш вариантини афзал кўриши мумкин.
Эслатиб ўтамиз, Рамуш 2023 йилда “Бенфика”дан “ПСЖ” сафига келиб қўшилган ва унинг амалдаги шартномаси 2028 йилгача мўлжалланган.
