«PSJ»нинг паради вақтида 13 ёшли ўсмир бир кўзидан айрилди
UEFA Чемпионлар Лигаси финалида «Пари Сен-Жермен»нинг Лондоннинг «Арсенал» клуби устидан қозонган ғалабасидан сўнг Париж атрофида оммавий тартибсизликлар авж олди. Оқибатда бир ўсмир бир кўзидан маҳрум бўлди, деб хабар бермоқда BFMTV телеканали.
Бир тахминга кўра, 13 ёшли болага пиротехника воситаси тегиши жароҳатга сабаб бўлган. Аммо депутат Али Диюара бошқа бир версияни илгари сурди: унинг сўзларига кўра, ўсмир одамларни тарқатиб юбораётган ҳуқуқ-тартибот идоралари ходимлари томонидан отилган резина ўқдан жабрланган. Сиёсатчи аллақачон прокуратурага шикоят аризаси киритган ва натижада тергов ҳаракатлари бошланган. Назорат органи полициячиларнинг ҳаракатларини текшириш учун Миллий полиция бош инспекциясига (IGPN) мурожаат қилди.
Оммавий тўқнашувлар ва вайронгарчиликлар «ПСЖ» Лондоннинг «Арсенал» клубини мағлуб этиб, қатор-асоса иккинчи марта кубокни қўлга киритган финал учрашувидан сўнг дарҳол бошланган. Ўйин 30 май куни Будапештда бўлиб ўтди ва 1:1 (пенальтилар бўйича 4:3) ҳисобида якунланди.
Финал куни хавфсизликни таъминлаш учун мамлакат бўйлаб 22 минг ҳуқуқ-тартибот ходими, шундан саккиз минг нафари Париж ва унинг атрофига сафарбар қилинган эди. Шунга қарамай, оқибатлар жиддий бўлди: тартибсизликлар давомида 219 киши жароҳат олди, 900 га яқин киши қўлга олинди. Ички ишлар вазири Лоран Нуньеснинг сўзларига кўра, бу ўтган йилга нисбатан 45 фоизга кўпроқдир.
