«ПСЖ» 2025/2026 йилги мавсум учун тўртинчи либосини тақдим этди (фото)
«ПСЖ» Jordan Brand томонидан тақдим этилган 2025/26 йилги мавсум учун тўртинчи либосини намойиш қилди.
Клубнинг расмий баёнотида янги форма дизайни қуйидагича тасвирланган:
«Асосан қора рангда, антрацит-кулранг акцентлар ва пушти туслар билан бойитилган. Янги футболка соф ва кучли кўринишга эга бўлиб, марказий қизил чизиқ билан ажралиб туради — клубнинг асосий дизайнига замонавий нозик ишора», — дейилади пойтахт клубининг баёнотида.
Янги тўпламда биринчи бор қўлланган Cross-Dye техникаси алоҳида қайд этилди — у майда контрастлар ва ноёб текстура эффектларини яратади. Ушбу дизайн ўтган мавсум катта талабга эга бўлган қанот нақшли кўк форманинг ўрнини босади.
Маълумот учун, Лига 1'нинг 13-туридан сўнг «ПСЖ» 30 очко жамғарган ҳолда турнир жадвалининг чўққисида бормоқда.
