«PSJ» 2025/2026 yilgi mavsum uchun toʻrtinchi libosini taqdim etdi (foto)
«PSJ» Jordan Brand tomonidan taqdim etilgan 2025/26 yilgi mavsum uchun to‘rtinchi libosini namoyish qildi.
Klubning rasmiy bayonotida yangi forma dizayni quyidagicha tasvirlangan:
«Asosan qora rangda, antratsit-kulrang aktsentlar va pushti tuslar bilan boyitilgan. Yangi futbolka sof va kuchli ko‘rinishga ega bo‘lib, markaziy qizil chiziq bilan ajralib turadi — klubning asosiy dizayniga zamonaviy nozik ishora», — deyiladi poytaxt klubining bayonotida.
Yangi to‘plamda birinchi bor qo‘llangan Cross-Dye texnikasi alohida qayd etildi — u mayda kontrastlar va noyob tekstura effektlarini yaratadi. Ushbu dizayn o‘tgan mavsum katta talabga ega bo‘lgan qanot naqshli ko‘k formaning o‘rnini bosadi.
Maʼlumot uchun, Liga 1'ning 13-turidan soʻng «PSJ» 30 ochko jamg‘argan holda turnir jadvalining cho‘qqisida bormoqda.
